| G³ówna | Nowe | Wydarzenia | Artyku³y i eseje | Badania i ¼ród³a | O ARMA-PL | Forum | ARMA |
|
| Peter von Danzig - Meister Andre Lignitzers Kurzes Schwert (73r - 79v) © 2004 Monika Maziarz |
Legenda
Transkrypcja73r Hye hebt sich an Maister Andreß kunst genant der Lignitzer Dem got genädig sey Daß kurtz swert zw gewappenter hant zù geleicher ritterlicher were Item nym daß swert mit der rechten hant pey dem pint / vnd mit der lincken greif mitten in die klingen / vnd gee vast in man / So mueß er stechen oder slahen / Doch kum vor piß rasch greif fährlich vnd pleib nahent ~ Daß erst stuck Item stich ym Inwendig zw° seine gesicht / Wert er dir daß / So var durch vnd setz ym aufwendig in sein gesicht / Wert er dir daß fürpaß / vnd streicht dir den ort Der wider pruch Item wer dir daß tùt vnd hat dir den knopf an den halß geworfen / So var mit der lincken hant von vnden auf zwischen seinen paiden arm / vnd begreif yn pey seine rechten arm / vnd swing dich den von ym auf dein rechte seitten / vnd - würff In vber die hüf ~ Aber ein pruch auf daß erst stuck 73v Item wenn er dir den knopf vmb den halß wil werfen / So greiff mit der linckn hant von dir / vnd greiff hinder sein rechte hant an daß pint / vnd nym den knopf / vnd zeuch den vndersich / vnd setz ym mit deinem swert an wo du wild Ein pruch dal wider den pruch Item wenn er dir knopf begriffen hat / So wind mit deinem knopf von vnden auf aufwendig vmb sein lincke hant / vnd schreit mit deinem rechten pain für dich / vnd stoß yn mit deiner klingen an sein lincken arm ~ Daß ander stuck Item stich ym aber den ersten stich zw seinem gesicht / vnd thùe zw dem andern mal alß du ym aber Inwendig zw seinem gesicht wöllest stechen / Inndeß var durch / vnd setz ym aufwendig zw° seinem gesicht an wenn er dir daß wert / So schreit mit deinem rechten pain hinder sein linckß / vnd stösß in mit dem gehültz in sein lincke vchsen / vnd stoß ein wenig vber sich so veltt er ~ Der wider pruch Item wer dir daß tùt / So schreit mit deinem lincken pain hinder dich / vnd vach den stoß zwischen dein paide hende in die klingen / vnd wind mit dem knopf von vnden auf zwischen sein paide 74r arm / vnd wind mit deine knopf Ein wider pruch wider den Item wer dir paide swert über den halß wil stossen / So stee freyleich still mit deinem rechten pain / vnd lasß dein swert faren pey dem pind / vnd greif mit deinem rechten arm hinden vmb seinen ruck / vnd ruck yn pey der mitt / So wurfstu in an zweifel ~ Daß dritt stuck Item stich ym aber Inwendig zù seinem gesicht / vnd var in dem andern stich durch / vnd stich ym aufwendig zw dem gesicht / Wert er dir daß aber / So schreit mit dem lincken pain zwischen seine paide / vnd greif mit deinem knopff aussen vber sein linckß pain in sein knyepüg / vnd leg dich mit der lincken achsel oben fast in yn / vnd heb vnden fast auf / vnd druck auf sein lincke seitten ~ Der widerpruch Item wer dir mit dem chnopf wil varen in die knyepüg dem greif mit deiner lincken hant hinder sein lincke hant pey dem arm / vnd greif mit dein° [wyraz dopisany] rechtn 74v rechten hant von vnden auf ym an den elpogen / vnd daß dein vinger oben ste / vnd würf yn auf daß maul ~ Daß vierd stuck Item wenn du Im Inwendig zw dem gesicht stichest / vnd er dir wider / So sich eben auf sein swert / vnd begreiff sein swert pey der klingen in die hant vnd setz im den ort an vnder sein linkß vchsen Wert er dir daß / vnd begreifft dir dein swert auch alß dw daß sein hast / So arbait auß einem reissen alß hernach geschriben stet auß wellichem du wild Daß erst reissen Item stich ym Inwendig zw dem gesicht Wert er dir daß / vnd setzt dir den stich ab / So wind mit deine knopf von vnden auf auf dein lincke seittn / vnd oben vber sein swertz klingen zwischen sein paide hend / vnd reiß vast an dich / So reistu in sein lincke hant von der klingen / So stich ym denn zw° dem gemächt / Ist er dir zw starck daß dw Im die hant von dem swert nicht gereissen magst / So wind mit deinem knopf aber von vnden auf auf dein rechte seittn vber sein lincke hant / vnd stoß in mit der klingen in sein lincke seitten von dir ~ Daß ander reyssen Item stich ym / Inwendig zù seinem ge 75r sicht / vnd wind aber mit dem knopf auff dein lincke seitten von vnden auf vber sein klingen zwischen seiner hant reyß aber vast an dich / vnd stich ym aber zù seinem gemäch Wert er dir daß vnd vecht dir daß swert / vnd dw daß sein daß paide swert gefangen sein / So würff dein swert mit dem knopf ym in sein rechte seitten / vnd spring mit deinem rechten pain hinder sein linkß / vnd nym den ruck / vnd heb in den eineß tzwerchen fingerß hoch von der erden / vnd slach in mit deinem rechten fuesß auß wendig an sein rechten enckel / vnd wurff in auf sein rechte seitten ~ Daß dritt reysßen Item thùe ym geleich alß oben geschriben stet / vnd ob paide swert gefangen warn / So würf ym aber den knopf in sein rechte seitten / vnd spring mit dem rechten pain hinder sein linckß / vnd greiff in mit deiner rechten hant yn pey seine lincken arspacken / vnd greiff mit dein° lincken hant von vnden auf ym an seinen kinpacken / vnd zeuch vnden an dich / vnd stoß oben von dir / So felt er an den ruck Der wider pruch Item wer dir mit der lincken hannt vert vnder den kinpacken / vnd dich 75v mit seiner rechten hant pey dem lincken arspacken hat / vnd wil dich vber ruck werffen / So greif mit deiner lincken hant ym auf sein lincke / vnd begreif yn pey den fingern / vnd prich im die hant auf dein lincke seitten / vnd var mit deiner rechtn hant an sein lincken elpogen / vnd nym im daß gewicht ~ Daß vierd reyssen Item ist daß aber paidew swert gefangen sein / So würf ym aber deinen knopf in sein rechte seitten / vnd spring Im mit dem rechten pain hinder sein linkß / vnd begreif in mit deiner lincken hant hinder seiner lincken hant pey dem arm / vnd greif mit deiner rechten hant in pey seinem elpogen vnd nym daß gewicht ~ ~ Daß fünfft reyssen Item / wenn er dir den swert gefangen hat / vnd du daß sein / So gee durch paidew swert auf dein lincke seittn / So windestu ym sein swert auß daß er dir daß lassen mueß / Helt er denn sein swert vnd lest dir daß dein / So thùe alß dw In zw° dem gemächt wöllest stechen / Wert er dir daß / vnd greift mit sein° lincken hant nach dem swert / So stich vnden durch sein swert auf sein rechte seitten ym vber sein rechten arm an sein prust so prichstu ym sein swert 76r auß seiner hant / So würf sein swert mit dem ort gegen ym / vnd mit deine swert fall in die ober hùt ~ Der wider pruch Item wer dir daß thùet / vnd dir durch paidew swert lauffen wil / So stoß ym paide swert vber den halß / vnd mach die scher ~ Ain wider pruch wider den pruch Item / wenn er dir die scher° hat gemacht / so greif mit deiner rechten hant von vnden auf hinder sein rechte in daß pindt daß dein negel an den fingern vbersich sten vnd würf denn dein swert vast von dir auf dein lincke seitten / vnd ker dich gegen ym auch auf dein lincke seittn vnd wind mit seinem knopf aussen vber sein rechte hant / vnd slach yn mit dem knopf vnd mit dem gehültz wo dw hyn wild ~ Daß sechst reissen Item / wenn die swert paide gefangen sein / so würf den chnopf vast von dir auf dein rechte seitten / vnd ym auff sein lincke seitten vnd spring mit deinem rechten pain hinder sein linkß / vnd greif mit deiner rechten hannt von vnden auf in sein rechte vchsen / vnd heb mit seine swert vber sich / So würfstu in auf dein rechte seitten daß ist daß pest / vnd daß letzt vnder den reyssen [wyraz dopisany] 76v Daß Ist aber ein stuck Item sticht er dir zw dem gemächt / So stich im auch zw dem gemächt einen stich / Den andern stich / Stich von oben nyder vber sein lincke hant zwischen sein paiden arm / vnd wind mit dem knopf von vnden auf in sein rechte seitten schreit mit deine rechten pain hinder sein linckß / vnd würf In vber die drech ~ Der wider pruch Item / wer dir daß tùt so lasß dein swert gen pey der klingen / vnd greif mit deiner lincken hant hinden vber sein schulter / vnd begreif dein swert wider pey der klingen / vnd druck yn vast zù dir / vnd swing dich von Im auf dein rechte seittn ~ Aber ein stuck Item arbait er mit dir hoch / vnd sticht dir zw dem gesicht / So stich von vnden auf zwischen seinen paiden armen / vnd vber sein lincke achsel begreiff yn mit deiner lincken hant hinder seine linckn / vnd würf dein swert mit dem pint auf dein lincke achsel / vnd greif mit deiner rechten in sein lincken elpogen stoß vast von vnden auf / vnd nym ym daß gewicht / So pleibt daß swert vnder seinem lincken arm zwischen ewer paider ~ Aber ein stuck 77r Item arbait er aber hoch mit dir / So stich aber vnden auf zwischen sein paidn arm / vnd lasß dein lincke hant varn von der clingen / vnd greif oben vber sein swert vasth / vnd begreif dein swert wider pey der clingen vnd stoß ym paide swert denn vber / den halß hinden vber seinen rucken gar obhin in sein paide knyepüg / vnd reiß vast vnden an dich / vnd mit dem haubt stoß oben vast von dir so würfstu In auf den ruck ~ Ein pruch da wider Item / wer dir daß tùt / vnd wil dir paide swert vber den halß stosen / So var mit deiner rechten hant In sein lincke seittn vber seinen ruck / vnd schreit mit deine rechten pain vorn für sein linckß pain / vnd würf in vber die hüff / Der pruch get zw paiden seitten ~ Aber ein stuck Item stich ym Inwendig zw dem gesicht / vnd begreiff denn sein swert pey der clingen zw deinem swert in dein lincke hant / vnd wind mit dem knopf von vnden auf hinder sein rechte hant / vnd heb denn vast vber sich / vnd reysß denn auf dein rechte seitten / So pleibt dir sein swert auf deinem rechtn arm / daß ist daß swert nemen ~ Aber ein stuck 77v Item / wenn du ym ein laufst so stich ym aufwendig zw dem gesicht / vnd greif mit dein° lincken hant Im zwischen sein paide hende in sein swertz klingen / vnd lasß denn dein swert fallen / vnd greif mit dein° rechten hant hinder sein lincke auch in sein swertz clingen / vnd druck mit deiner rechten hant sein swert vast zw dir in dein rechte seitten / So greif denn mit deiner lincken hant von oben nyder zwischen seiner paider arm ym hinder sein rechte hant in sein pint / vnd wind denn mit seinem chnopf von vnden auf zwischen sein paide arm so nympstu Im sein swert ~ Ein wider pruch Item wer dir daß tùt / vnd dir daß swert nemen / vnd aufwinden wil / So greif mit deiner rechten hant hinder sein rechte / vnd mit deiner lincken hinder sein rechten elpogen / So gewingstu ym den ruck an Aber ein stuck Item wenn ir paide vmb ein swert kriegt / So tracht daß dw hast dein lincke hant hinder seiner rechten in seinem pint / vnd dein rechte hant zwischen seiner peiden hendt in seiner swertz klingen / So begreif in denn mit deiner lincken hant hinder seinem rechten / vnd greif denn mit deiner rechten von vnden auf vnder sein rechten arm / vnd schreit mit deinem rechten pain hinder sein linkß 78r Zucht er daß pain hindersich / So schreitt zwischen seine paide pain / vnd stoß ym dann sein arm mit der lincken hant von dir auf dein lincke seitten / vnd zeuch Im mit der rechten hant sein rechten arm vast an dich / vnd ein wenig vber sich auf dein rechte seitten so feltt er ~ Hye heben sich an die mortschleg Der erst mortschlag trit vast In in / vnd tùe sam dw in Inwendig zw dem gesicht wellest stechen / vnd lasß denn dein rechte hant varen vonn deinem pint / vnd kum do mit deiner lincken hant zw° hilff in die swertz klingen / vnd slach in mit dem knopf oder mit dem gehultz / oder mit dem pint zù seine haubt ~ Ein pruch do wider Item wer dir zw dem kopff slecht / So vach den slack zwischen deine paiden henden in dein swertz clingen / vnd wind mit dem knopf auf dein lincke seitten vber sein gehültz / vnd ruck vast an dich / So zeuchstu im daß swert auß seinen henden ~ Der ander mortslagk Item stich ym aber / Inwendig zw dem gesicht / vnd lasß aber dein swert varn 78v mit dem pindt / vnd begreif aber dein swert mit paiden henden pey der clingen / vnd slach yn mit dem chnopf zw der lincken achsel ~ Ein pruch da wider Item vach den slagk zwischen dein paide hend in die clingen / vnd wind mit dem knopf von oben nyder vber sein gehultz / vnd ruck vast an dich / So nympstu ym aber sein swert alß vor ~ Der dritt mortschlagk Den dritten mortschlagk den thùe zw seinem lincken elpogen / vnd den prich alß dw die vorigen zwen geprochen hast Der vierd mortschlagk Item tùe sam dw In zw° seinem gesicht wöllest stechen / vnd slach in mit dem knopf an sein lincke knyepüg ~ Der pruch da wider Wer dir zw der lincken knyepüg slecht / So vach den slagk zwischen dein paide hend in dein swertz clingen / vnd daß dein knopf gegen der erden stee / vnd wind auf dein rechte seittn von vnden auf / vnd ruck vast hindersich / So nympstu ym sein swert ~ Der fünfft mortslagk Item tùe aber sam du ym wilt an setzen 79r Inwendig in daß gesicht / vnd slach In mit dem knopf nyden in seine lincken enckel Ein pruch da wider Item wer dir zw dem lincken enckel slecht / So lasß dein swert varn pey dem knopf / vnd mit dem pint in die erd / So vechstu den slagk in daß gehultz / vnd spring rasch mit deine rechten pain hinder sein lincke seitten / So gewinstu ym den ruck an Vier an setzen Gee rasch in In / vnd setz ym an sein gesicht / oder an den halß / oder an sein prust / oder vnder sein linckeß vchsen ~ Ein pruch Hat er dir an gesetzt mit seine swert an dein prust / So var mit der lincken hant von oben nyder auf sein swert / vn halt daß vest pey dem ort / vnd stich den mit deine swert hinder sein linkß pain / vnd schewb mit deiner prust ein wenig fur dich vnd zuck denn deinen leib pald Ein ander pruch Item Hat er dir aber an gesetzt / vnd du ym auch / So stich mit deine swert hinder 79v seinen hantschùch / vnd lauf für dich auf sein lincke seitten ~ Aber ein lösung Item wenn ir paide swert habt an gesetzt / So greif mit deiner lincken hant aussen vber sein lincke / vnd zeuch den ort ein / vnd stich von vnden auf in sein lincken tenär ~ Aber ein losung Item / wenn er dir hat an gesetzt an dein prust / vnd wil dich dringen / So stich mit dem swert von oben nyder vber sein lincken arm zwischen seiner paider hennd / vnd wind mit deinem knopf von vnden auf gegen seiner rechten seitten so prichstu ymß ~ Ein wider pruch Item wer dir daß tùt / So lasß dein lincke hant von der clingen / vnd schreit mit deine lincken pain fur In begreif dein swert wider pey der clingen / vnd druck in vast zw° dir / vnd swing dich denn auf dein rechte seitten / So wurfstu yn fur dich nyder ~ |